Unang giseryal sa Bisaya magasin, ang Mubong Kurso sa Pagsulat Og Sugilanon mabasa na karon isip usa ka libro. Usa ka esensyal nga tamdanan ug giya sa pagpanugid gikan sa maalamong dagang ni Omar Khalid. Sa mga nakabasa na sa seryal apan ganahang mobasa og balik, sa mga nangitag giya sa pagsulat og sugilanon, sa mga gustong palig-onon pa ang ilang arte ug kahibalo, ug sa mga nangaraan na nga gusto lang mosubay balik sa rudimento sa pagpanugid.
Di na mo kinahanglang moeskwela pa o mokuhag kurso sa panulat aron mapalapdan ang inyong kahibalo sa arte sa panugilanon. Basaha lang kining libroha.
KABAHIN SA TAGSULAT
Si OMAR KHALID, sa iyang libreng oras, magkaskas-kaskas og gitara, magpatokar-tokar og plaka, magsulat-sulat og bisan unsa aron ingnong magsusulat, magguroy-guroy sa iyang iro nga si Potpot (kay patay na man si Airrah), magbisikleta, magbasa-basa og bisag unsa, makig-estorya sa mga silingang palahubog ug palautog, magtanom-tanom, ug sa gabii, maghangad-hangad sa mga bituon uban sa hunsoy ug serbesa. Ang iyang damgo yano ra pero molahutay kini sama kadugay sa mga gabiing way Buwan.